Hestoria d'Asturies: El 20º cabudañu de la traxedia de Nicolasa
El 31 de agostu de 1995, 14 mineros perdíen la vida nel Pozu Nicolasa (Ablaña, Mieres) comu consecuencia d’un españíu de grisú.
1-Septiembre-2015: Fuente: Nota de prensa de Andecha Astur

La denuncia d’Andecha Astur obligó non solo a revisar tolos sistemes de seguranza de la minería asturiana, sinon que dexó nidio la esistencia de responsables na empresa y nes direiciones sindicales.

Dende un entamu pretendieren tapecer la traxedia apelando a “la mala suerte”, el “pelligru propiu de la mina”, la “heroicidá de los mineros” o los más poéticos del “tributo en sangre que exige la mina”, pero la denuncia presentada por Andecha Astur punxo n’evidencia la esistencia de deficiencies na seguranza con responsables d’una traxedia que nun tenía por qué tener ocurrío. Amás dexó claro que, por primer vegada na hestoria de la minería asturiana, había quien taba dimpuestu non solo a llorar a los muertos, sinon a defendelos y a desixir responsabilidaes pa que sucesos comu esti nun tornaren a pasar.

Demientres más de dos años Andecha Astur llevó pelos xulgaos a presidentes d’Hunosa y obligó a que les propies direiciones sindicales de CCOO y SOMA-UGT, que fasta entós se conformaren con menaciamos, tuvieren de presonase nun xuiciu nel que quedó probao que les sos responsabilidaes y les de la empresa diben de la man, amás de collaborar con Hunosa non solo pa defendese, sinon pa presionar a los más débiles, les families de les víctimes, pa qu’aceutaren indenizaciones económiques pa poner fin a les demandes llegales.

A la fin, la sentencia dexó impunes a los responsables y punxo n’evidencia la falta garantíes qu’ufre la xusticia española, pero quedó claro al conxuntu de la sociedá asturiana que les muertes na mina nun yeren inevitables, nin castigu divinu, y que los responsables yeren tantu de la empresa comu les mencionaes direiciones sindicales.

De magar entós camudaron dafechu les midíes de seguranza nes mines. Nicolasa marcó un enantes y un dempués na hestoria de la minería asturiana a tolos niveles, y foi la batalla llegal d’Andecha Astur la que forció a ello.

Pocu tiempu dempués entamaríemos a denunciar a José Ángel Fernández Villa por vendíu y corruptu, mentes toos miraben pa otru llau y pretendíen negar aquello de lo que se beneficiaben. Tovieren que pasar cuasique otros 20 años pa que quedara n’evidencia lo que d’aquella denunciábemos... pero esa ye otra hestoria.

Andecha Astur

Artículos y temas relacionados

Sección noticias de Asturias