UNIDÁ denuncia énte la Fiscalía de Medio Ambiente’l valtamientu de la encina del solar de los Py

De llegar a bon términu la denuncia, los responsables del valtamientu puen ser sancionaos con pena de seis meses a dos años de prisión y una multa d’ocho a venticuatro meses

10-Enero-2008 Nota de prensa de UNIDÁ

UNIDÁ denunció güei énte la Fiscalía de Medio Ambiente n’Uviéu un probable delitu penal por valtamientu illegal d’una encina, catalogada como especie de flora amenazada, qu’amás implica una actuación urbanística posterior na contorna.

El pasáu 6 de setiembre de 2007, operarios de la empresa Viviendas de Corvera S.L. tarazaron ensin permisu dalu un exemplar d’encina de 15 metros y más d’un sieglu d’antigüedá que ta catalogada como especie de flora amenazada nel “Catálogo regional de especies amenazaes de la flora del Principado de Asturias”. Tamién existe un Plan de manexu de les encines (Quercus ilex L. y Quercus rotundifolia Lam.) pa protexer la conservación de la especie.

L’Ayuntamientu de Corvera, per aciu del edil d’Urbanismu dio anuncia de que “va a tomar medidas legales contra la promotora encargada de construir las viviendas en la calle Palacio Valdés, junto a la casona de los Py, de Las Vegas". La acusa de deshacerse de una encina centenaria que estaba protegida por el Servicio de Patrimonio. El edil anunció que la empresa “no tenía permiso para hacer esos trabajos”.

Pa UNIDÁ estes midíes foron insuficientes, dao qu’el valtamientu illegal, acordies colo que se deduz de la noticia, nun tuvo consecuencies penales y, hasta la fecha, según tenemos conocencia, nin siquiera alministratives, pela parte de la Conseyería de Mediu Ambiente nin del Ayuntamientu de Corvera, dao que la promotora sigue p’alantre sin que se paralizaren les obres.

UNIDÁ yá denunciare a mediaos de Xunetu énte l’Ayuntamientu de Corvera la colación d’unos cartelos publicitarios illegales de la Agencia Ayala, advirtiendo al nomáu Ayuntamientu de la esistencia d’una encina protexía y de dellos inmuebles tamién pa protexer (Casona de los Py) pa qu’actuare en consecuencia. Hai una nidia dexación de funciones pola parte del Ayuntamientu de Corvera, porque un mes y mediu más tarde los operarios de Viviendas de Corvera S.L. valtaron illegalmente la encina.

Por too esto, UNIDÁ camienta qu’actuación tala supón un presuntu delitu contra la flora amenazada y pide, amás, a la Fiscalía que paralice cualesquier tipu d’actuación urbanística na redolada mentantu nun se determinen les responsabilidaes correspondientes.

UNIDÁ

Agregue esta noticia. Marcadores sociales