Unidá propon declarar el texu d'Abamia como Monumentu Natural

La categoría de Monumentu Natural esta contemplada en la Llei 5/1991, de 5 de abril, de Protección de los Espacios Naturales del Principáu d'Asturies y en el PORNA -Plan de Ordenación de los Recursos Naturales d'Asturies-
El texu d'Abamia destaca pola so antigüedá, alrodiu de los 500 años

4-Noviembre-2007 Nota de prensa de UNIDÁ

Propuesta de declaración del texu d'Abamia como Monumentu natural

A LA CONSEYERIA DE MEDIU AMBIENTE Y DESARROLLU RURAL

MARIA EULALIA GARCÍA RUBIERA, mayor d'edá, vecina de Uviéu/Oviedo, formula la propuesta que vien darréu en nome de la coalición UNIDÁ, y nel suyo propiu, solicitando se-y notifiquen, como interesada, les resoluciones y actos alministrativos correspondientes, de conformidá con la Llei 30/92, de 26 de payares, de Réxime Xurídicu de les Alministraciones Públiques y del Procedimientu Alministrativu Común (artículos 31,35,58 y 59).

ANTECEDENTES Y ESPOSICION DE MOTIVOS

La Llei 5/1991, de 5 de abril, de Protección de los Espacios Naturales del Principáu d'Asturies contempla, en su artículu 13, que "aquellos espacios del territoriu rexonal que contengan elementos y sistemes naturales d'especial interés o valores naturales sobresalientes podrán ser declaraos protexíos d'alcuerdu con lo regulao n'esta Llei", y según el artículo 19 de la mesma "los monumentos naturales son espacios o elementos de la naturaleza constituyíos básicamente por formaciones de notoria singularidá, rareza o belleza, que merecen ser oxetu d'una protección especial".

Por otra parte, el texu ye una planta que pertenez al catálogu de flora menazada del Principáu d'Asturies, siendo sobradamente conocíu el so valor hestóricu, la so belleza y la so estrecha relación con Asturies. Nesti sen, el texu d'Abamia destaca pola so antigüedá, alrodiu de los 500 años, y pol so simbolismu hestóricu, al tar avenceyáu a la tamién hestórica ilesia de Santa Eulalia d'Abamia. Ye poco comprensible que xunto a los texos de Bermiegu, Santa Coloma, Santibáñez de la Fuente, Lago, Salas y Pastur, declaraos nel so día monumentos naturales, nun se haya reconocíu tovía esta categoría de protección pal texu d'Abamia.

Dase la circustancia de que'l texu d'Abamia atópase nestos momentos nuna situación llaceriosa por mor de unes obres de supuesta rehabilitación de la ilesia, que orixinaron el corte de les sos raigaños de la fastera Este, a consecuencia de la excavación de una zanxa de 40 cm. de profundidá y más de 10 metros de llargu, averada a una moria esistente ente'l texu y l'atriu: ye una razón adicional pa solicitar que se proceda urxentemente a incluyílu na Rede d'Espacios Protexíos del Principáu d'Asturies.

PROPUESTA

Solicitamos que s'entamen los trámites afayaízos para declarar el texu d'Abamia Monumentu natural, según lo dimpuestu na Llei 5/1991, de 5 de abril, de Protección de los Espacios Naturales del Principáu d'Asturies, y nel Plan de Ordenación de los Recursos Naturales d'Asturies

Xunta Coordinadora de UNIDÁ

Agregue esta noticia. Marcadores sociales