UNIDÁ pidi que s’ellabore un Plan de Protección y Rehabilitación de l’Arquitectura Popular

La coalición política UNIDÁ responsabiliza de la destrucción de los teitos y horros de cubierta vexetal a los sucesivos gobiernos del PSOE y PP

16-Agosto-2007 Nota de prensa de UNIDÁ

Pa estos dos partíos la cultura asturiana nun ye más que una anécdota folclórica ensin personalidá nenguna. Pa muestra’l fechu del qu’informó estos díes un mediu de comunicación nel que s’informaba que la Conseyería de Cultura encargare nel añu 1985 un estudiu sobre los teitos y horros con teyáu vexetal n’Asturies, hebo qu’esperar 22 años pa que s’asoleyare esti informe. Col pasu d’esti tiempu, y según los autores Armando Graña y Juaco López Álvarez, el 80% de los teitos y horros catalogaos ya nun existen anguaño.

Pa UNIDÁ esta llaceriosa situación ye causa de la sutil ineficacia de los gobiernos del PSOE y PP no que cinca a l’arquitectura popular asturiana y, en xeneral, a la cultura asturiana. Nun ye la primer vez que los mandatarios asturianos d’estos dos partíos desprecien con ciñu aspectos culturales d’Asturies. Nel añu 2001 aprebóse la Llei 1/2001 de Patrimoñu Cultural onde se ignoró la identidá oral asturiana, marcando esta llei con una ambigüedá mui estudiada ensin resaltar la importancia de la llingua asturiana como’l mayor patrimoñu cultural asturianu.

Tamién ye vergoñoso la situació na que s’alcuentren munchos de los castros prerromanos n’Asturies.

Como consecuencia del abandonu, y desaniciu, d’una bona parte del patrimoñu etnográficu asturianu pol desdexamientu de los sucesivos gobiernos asturianos, UNIDÁ va solicitar a l’alministración asturiana que s’ellabore un Plan de Protección y Rehabilitación de l’Arquitectura Popular Asturiana que tenga una dotación específica nos presupuestos xenerales d’Asturies nel añu 2008 y posteriores.

Con too ello, UNIDÁ resérva entamar cualisquier acción llegal que correspuenda, contra’l Gobiernu Asturianu, por dexación de funciona na preservación del patrimoñu de la sociedá asturiana.

UNIDÁ

Agregue esta noticia. Marcadores sociales